Սույն թվականի դեկտեմբերի 9-ին, Գյումրու թիվ 4 արհեստագործական պետական ուսումնարանում, «Առողջ ապրելակերպ» դասընթացի շրջանակում առաջին կուրսերի ուսանողների համար անցկացվեց սեմինար-պարապմունք՝ «Թմրամոլության բացասական հետևանքները» խորագրով՝ նվիրված թմրամոլության և թմրամիջոցների ապօրինի շրջանառության դեմ պայքարին:
Սեմինարի նպատակն էր ձևավորել բացասական վերաբերմունք թմրամոլության և թմրանյութերի ապօրինի շրջանառության նկատմամբ, կարևորել առողջության պահպանումը, գնահատել տեղեկացված լինելու կարևորությունը, հավատարիմ մնալ առողջ ապրելակերպի սկզբունքներին։
«Համակարգիչների շահագործում» մասնագիտության երկրորդ և երրորդ կուրսերի ուսանողները կատարել էին հետազոտական աշխատանքներ, որոնք նվիրված էին թմրամոլության խնդրի խորացման պատճառներին և դրա բացասական հետևանքներին: Աշխատանքներում ուսումնասիրվել էին թմրամոլության ազդեցությունները ինչպես անհատական, այնպես էլ հասարակական մակարդակում: Ուսանողները հետազոտությունները ներկայացրին թեմատիկ սահիկաշարերի ցուցադրմամբ։ 
Ներկայացված տեղեկատվությունը տպավորիչ և ազդեցիկ էր, մեջ բերված տեսանյութերը` ահազանգող: 
Վերլուծությունների արդյունքում մասնակիցները եկան եզրակացության, որ անհրաժեշտ է հրատապ ուշադրություն սևեռել թմրամոլության խնդրի վրա՝ հասարակության առողջությունը և անվտանգությունը պահպանելու նպատակով: Բոլորս միահամուռ ուժերով պետք է վերակառուցենք մեր երկիրը, զարգացնենք համայնքները, մեր կյանքը, ինքնությունը առանց թմրամիջոցների՝ ապրելով, սիրելով, արարելով: