Գյումրու թիվ 4 արհեստագործական պետական ուսումնարանում իրականացվեց նախագծային աշխատանք՝ «Հին հագուստի նոր շունչը․ էկոտոպրակներ սեփական ձեռքերով» թեմայով՝ կաշվե իրերի արտադրության տեխնոլոգիա 1-ին և խոհարարական գործ՝ խոհարար 2-րդ կուրսի ուսանողների մասնակցությամբ։

Նախագծի նպատակն էր բարձրացնել ուսանողների բնապահպանական գիտակցությունը, ներկայացնել պոլիէթիլենային տոպրակների վնասակար ազդեցությունը շրջակա միջավայրի վրա և առաջարկել դրանց այլընտրանքային լուծումներ՝ էկոլոգիապես մաքուր կտորե և թղթե էկոտոպրակների պատրաստման միջոցով։

Պաշտպանության ընթացքում ուսանողները ներկայացրին համամոլորակային և բնապահպանական հիմնախնդիրները, անդրադարձան կլիմայի փոփոխությանը, ջրի և մթնոլորտի աղտոտմանը, կենսաբազմազանության կորստին, ինչպես նաև պլաստիկ թափոնների վնասակար ազդեցությանը մարդու և բնության վրա։

Ներկայացվեցին տվյալներ պոլիէթիլենային տոպրակների օգտագործման, դրանց երկարատև քայքայման և օվկիանոսների աղտոտման վերաբերյալ։

Ուսանողները ուսումնասիրել և ներկայացրել էին աշխարհի տարբեր երկրներում իրականացվող բնապահպանական քաղաքականությունները՝ կապված պոլիէթիլենային տոպրակների սահմանափակման և վերամշակման հետ։