«Մասնագիտական կրթությունը՝ բարեկեցության գրավական» կրթական ծրագրի շրջանակում սեմինար

2022 թվականի հոկտեմբերի 20-ին Գյումրու թիվ 4 արհեստագործական պետական ուսումնարանում «Ընտանիք» բարեգործական հասարակական կազմակերպության, «Արցախի սոցիալական զարգացման ծրագրերի» հիմնադրամի և Արցախի Հանրապետության կրթության, գիտության, մշակույթի և սպորտի նախարարության համագործակցությամբ իրականացվեց «Մասնագիտական կրթությունը՝ բարեկեցության գրավական» կրթական ծրագրի շրջանակում սեմինար: Քննարկվող թեմաներն էին «Կարիերայի ուղղորդման կենտրոնի գործառույթները» և «Հարցազրույցին ներկայանալու հմտությունները» ։

Սեմինար պարապմունքին մասնակցում էին կրթօջախի առաջին կուրսեցիները և Արցախից ժամանած տարբեր մասնագիտության երիտասարդ ուսանողներ։ Սեմինարը համատեղ վարում էին Գյումրու թիվ 4 արհեստագործական պետական ուսումնարանի կարիերայի ուղղորդման կենտրոնի պատասխանատու Կ․Ղարագյոզյանը և Ձեռներեցություն մոդուլ դասավանդող դասախոս Ռ․Պետրոսյանը՝ հետաքրքրաշարժ սահիկաշարի և տեսանյութերի ցուցադրությամբ։ Մասնագիտությամբ կողմնորոշված ուսանողների հետ քննարկվեցին «Գործատուին պատշաճ ձևով ներկայանալու հմտություններ», «Ինչպե՞ս պատրաստվել հարցազրույցի», «Ի՞նչ է աշխատաշուկան» և այլ թեմաներ։ Հարցերի տեղատարափով ավարտվեց մասնագիտական սեմինարը և տրամաբանորեն միմյանց հետ շաղկապված թեմաները ուսուցողական էին։

Փոխտնօրեն Ա․Մկրտչյանը արցախցի հյուրերին մանրակրկիտ ներկայացրեց կրթօջախում գործող սոցիալական ձեռնարկությունների դերը և ծավալած գործունեությունը, գաղափարը բիզնեսի վերածելու փորձը։ Երիտասարդ սովորողների միջև ծավալվեց հետաքրքիր երկխոսություն` «բիզնես գաղափար» թեմայի շուրջ։ Ուսանողական կազմակերպության անդամները, իբրև ապագա գործարարներ, յուրովի ձևով հանդես եկան և արհեստավարժորեն ներկայացրին աշխատանքի վրա հիմնված ուսուցման առավելությունները։