Հունիսի 30-ին ՄԿՈՒ զարգացման կենտրոնի նախաձեռնությամբ անցկացվեց «Աշխարհի հմտություններ-2016» մրցույթի ազգային փուլի մրցանակաբաշխությունը և փակման արարողությունը:
Միջոցառումը նվիրված էր 2016թ. մայիսի 14-28-ին կայացած «Հայաստանի հմտություններ» ազգային մրցույթի մասնակիցների պարգևատրմանը՝ «Խոհարարություն», «Ոսկերչություն» և «Նորաձևության տեխնոլոգիա» մասնագիտությունների գծով:
ՄԻջոցառմանը ներկա էին ՀՀ ԿԳ նախարար Լևոն Մկրտչյանը, ՄԿՈՒ ուսումնական հաստատությունների տնօրեններ, գործատուներ, միջազգային կազմակերպությունների ներկայացուցիչներ, սոցիալական գործընկերներ, ուսանողներ:
Շնորհավորելով մրցույթի մասնակիցներին՝ նախարար Լևոն Մկրտչյանը հաղթողներին հանձնեց մրցանակներ և վկայականներ, իսկ առաջին տեղ զբաղեցրած 3 մասնակիցներին՝ նաև մեդալներ:
Գյումրու թիվ 4 արհեստագործական պետական ուսւոմնարանի ոսկերիչ մասնագիտությամբ երրորդ կուրսի ուսանող Հովհաննես Մանվելի Նազարյանը «Աշխարհի հմտություններ» միջազգային մրցույթի ազգային փուլին մասնակցելու և «Ոսկերչություն» մասնագիտության գծով առաջին տեղը զբաղեցնելու համար պարգևատրվեց ոսկե մեդալով, մասնակցության վկայականով և մրցանակով, նույն կուրսի ուսանող Արտյոմ Աղասու Զուրնաչյանը՝ վկայականով և մրցանակով:
Առանձնահատուկ էր «Երևանի ոսկերչական գործարան» ընկերության գլխավոր տնօրեն, Հայաստանի ոսկերիչների միության նախագահ Էմիլ Գրիգորյանի գնահատականը, ով իր համագործակցությունն ու օժանդակումը առաջարկեց ուսումնարանում ոսկերչական մասնագիտական կրթությունն առավել բարձր որակով իրականացնելու համար:
Հովհաննես Նազարյանը Աբու Դաբիում կայանալիք «Աշխարհի հմտություններ» միջազգային մրցույթին ոսկերչություն մասնագիտությամբ ներկայացնելու է Հայաստանը: