Գյումրու թիվ 4 արհեստագործական պետական ուսումնարանը և «Ընտանիք» ՄՊՍ կենտրոնը հյուրընկալեցին Շիրակի պետական համալսարանի «Հոգեբանություն» մասնագիտության 2-րդ կուրսի ուսանողներին։

Այցի ընթացքում ուսանողները հնարավորություն ունեցան ծանոթանալու ուսումնարանի մասնագիտություններին, կրթական ծրագրերին և ուսումնական գործընթացի առանձնահատկություններին։ Կարիերայի ուղղորդման կենտրոնի պատասխանատու Կիմա Ղարագյոզյանը ներկայացրեց ուսումնարանի առաջարկած բազմաբնույթ մասնագիտական կրթական հնարավորությունները և կենտրոնում ուսուցանվող մասնագիտությունները, գործունեությունը, ձեռքբերումները։

Ուսանողները շրջայցի ընթացքում մասնակցեցին մասնագիտական աշխատարաններին, որտեղ գործնականորեն ծանոթացան տարբեր ոլորտների առանձնահատկություններին։ Այս փորձառությունը նպաստեց նրանց մասնագիտական կողմնորոշմանը՝ տրամադրելով արժեքավոր տեղեկատվություն արհեստագործական կրթության և մասնագիտական զարգացման հնարավորությունների մասին։

Այցը կարևոր քայլ էր ուսումնական հաստատությունների համագործակցության և ուսանողների մասնագիտական հմտությունների զարգացման ճանապարհին։