Հոկտեմբերի 11-ին Գյումրու թիվ 4 արհեստագործական պետական ուսումնարանում գրադարանավարի և ուսանողական խորհրդի նախաձեռնությամբ կազմակերպվեց Ամենայն հայոց բանաստեղծի ծննդյան 150-ամյակին նվիրված գրական ցերեկույթ: 
Գրադարանավարի օրվա խորհուրդը գրքի, գիտելիքի և ընթերցանության դերի վերարժևորումն էր, ինչպես նաև Ամենայն հայոց բանաստեղծի գրական ժառանգության, ազգանվեր գործունեության գնահատումն էր: 
Ուսումնական հաստատության ընթերցասրահը կրում էր Թումանյանի գեղագիտության կնիքը. բանաստեղծի կյանքին և ստեղծագործությանը վերաբերող գրքեր, գրասեղան՝ զարդարված բանաստեղծի սիրելի առարկաներով, ուսանողների ձեռքով պատրաստած ցուցապաստառ՝ ամփոփված բանաստեղծի առանձնահատուկ վերաբերմունքով, հոգատարությամբ և գրքերի հանդեպ անմնացորդ սիրով:
Ուսանողները ներկայացրին բանաստեղծի կյանքին և ստեղծագործությանը վերաբերող մանրամասներ, այնուհետև ցուցադրվեց Թումանյանի մասին տեսաֆիլմ:
Հայ մեծագույն գրողը միջոցառման ներկաների կողքին էր...թե՛ իր ուրույն թումանյանական ժպիտով, թե՛ իմաստուն խոհերով ու խորհուրդներով 
Ցերեկույթը եզրափակվեց Թումանյանի տիեզերական ոգին արտահայտող քառյակների ընթերցմամբ և վերլուծությամբ:  

Գրադարանավար՝ Ս. Հակոբյան