2022 թվականի հոկտեմբերի 19-ին՝«Ընտանիք» բարեգործական հասարակական կազմակերպության և «Արցախի սոցիալական զարգացման ծրագրերի» հիմնադրամի համագործակցությամբ «Մասնագիտական կրթությունը՝ բարեկեցության գրավական» կրթական ծրագրի շրջանակում կազմակերպվեց Արցախի տարբեր կրթական հաստատությունների ուսանողների ճանաչողական այցը Գյումրու թանգարաններ և գեղագիտական ազգային կենտրոնի Գյումրու մասնաճյուղ: Նրանց ուղեկցեցին Գյումրու թիվ 4 արհեստագործական պետական ուսումնարանի ուսանողները: Քաղաքի կենտրոնում գտնվող պատմական ու մշակութային վայր համարվող «մուսաների տները» վկայում էին Գյումրվա առօրյայի, մշակույթի հարուստ պատմական ժառանգության մասին։ «Մարիամ և Երանուհի Ասլամազյան քույրերի պատկերասրահը» աշխարհի եզակի պատկերասրահն է, որտեղ պահպանվում է Մարիամ և Երանուհի Ասլամազյան քույրերի աշխատանքների ամբողջական հավաքածուն: Ուսանողները ծանոթացան նաև Ավ․Իսահակյանի, Հ․Շիրազի, Մ․Մկրտչյանի անձնական իրերին, խնամքով պահպանված ձեռագրերին, տպագիր գործերին և մեզ փոխանցված մշակութային ժառանգությանը։ Կրթօջախի և Արցախից հյուրընկալած թվով 38 ուսանողներ ու վարպետներ ինքնաբավ էին․ քանզի այցելությունը գեղագիտական հաճույք պատճառեց դիտորդներին: Մշակութային ու պատմական արժեք ներկայացնող հայկական ստեղծագործությունների միջոցով այցելուները ծանոթացան հայոց պատմությանը, ինչպես նաև մարդկային մշակույթի ու պատմության վերաբերյալ դասեր քաղեցին։