«ԼԱՎ ԳՐԱԴԱՐԱՆԸ ՏԻԵԶԵՐՔԻ ԳՐՔԱՅԻՆ ԱՐՏԱՑՈԼՈՒՄՆ Է»

ՆԻԿՈԼԱՅ ՌՈՒԲԱԿԻՆ

Գյումրու թիվ 4 արհեստագործական պետական ուսումնարանի ուսանողներն այցելեցին Շիրակի մարզային գրադարան՝ «Լավ գրադարանը տիեզերքի գրքային արտացոլումն է» խորագրով գրական մտքերի փոխանցման և ընթերցանության առաքելությամբ։

Ուսանողներն անդրադարձան հայ ժողովրդի կյանքում գրքի` որպես ինքնության վկայության, ազգային նկարագրի կարևորագույն գրավականի, մեր ոսկեղենիկ մայրենիի փայլուն արտահայտության, մինչև մեր օրերն ունեցած անփոխարինելի դերակատարության հարցին: Մասնակիցները կլոր-սեղանի շուրջ դասական և ժամանակակից գրական ստեղծագործությունների ընթերցանությամբ բացահայտեցին նոր մտքեր, կատարեցին մեջբերումներ, վերլուծություններ և փոխանակեցին կարծիքներ:

Շրջելով գրադարանի սրահներում նրանք ծանոթացան գրքային հարուստ ֆոնդին, եզակի հավաքածուներին, գրադարանի աշխատանքներին, ժամանակակից գրադարանների դերին ու գործառույթներին, տեխնոլոգիական միտումներին, գրադարանից օգտվողների իրավունքներին ու պարտականություններին: