Սպորտային մրցույթ ՝ նվիրված Հայոց բանակի 27-ամյակին
25/02/2019
Փետրվարի 22-ին Գյումրու թիվ 4 արհեստագործական պետական ուսումնարանում անցկացվեց սպորտային մրցույթ-միջոցառում՝ նվիրված Հայոց բանակի 27-ամյակին: Մրցույթին մասնակցեցին ուսումնարանի, N զորամասի և «Ընտանիք» կենտրոնի հավաքական թիմերը՝ իրենց խորհրդանշական անվանումներով:
Միջոցառման նպատակն էր խորացնել ուսանող-զինծառայող կապը, զարգացնել վստահություն սեփական ուժերի նկատմամբ:
Մրցույթն անցկացվեց սեղանի թենիս, շախմատ, բազկամարտ մարզաձևերով՝ պահպանելով օլիմպիական սկզբունքը:
Միջոցառումը սկսվեց ՀՀ պետական օրհներգով: Ներկաները ծանոթացան մրցույթի կանոնակարգին, մրցավարներին:
Դահլիճում տիրում էր մրցակցային պայքարի թեժ մթնոլորտ. թե՛ զինվորները, թե՛ դեռահասները ոգևորված էին՝ լցված հաղթանակի ձգտումով:
Մինչ մրցույթի արդյունքների ամփոփումը, ռադիոմեխանիկ երկրորդ կուրսի ուսանող Տարոն Ղազարյանը հանդես եկավ հայրենասիրական երգերով:
Ամփոփելով մրցաշարի արդյունքները՝ 55035 զորամասի հրամանատարի տեղակալ, անձնակազմի հետ տարվող աշխատանքների գծով փոխգնդապետ Արմեն Գրիգորյանն իր ելույթում նշեց, որ կարևոր են նմանօրինակ միջոցառումները: Դրանք նպաստում են ուսանողների ռազմահայրենասիրական դաստիարակությանը և խրախուսում զինծառայողներին:
Գյումրու թիվ 4 արհեստագործական պետական ուսումնարանի տնօրեն Քնարիկ Ահարոնյանի կողմից հաղթող մասնակիցները պարգևատրվեցին պատվոգրերով և մրցանակներով:
Գովելի էր այն փաստը, որ բոլոր մարզաձևերում առաջին տեղ զբաղեցրին Հայոց բանակի շարքային զինվորները, ովքեր վառ օրինակ ծառայեցին դեռահասների համար: